महिला उद्घोषक
सपाय सुनतो लोग के जुहार
आकाशवाणी
चो विशेष प्रसारण ‘रमन के गोठ‘ ने आमी सपाय सुनतो लोग के स्वागत करुंसे,
जुहार करुंसे। कार्यक्रम चो 23 नम्बर चो कड़ी काजे, आकाशवाणी चो स्टूडियो ने
माननीय मुख्यमंत्री डॉ. रमन सिंह जी अमरलासोत।
डॉ. साहब, जुहार। कार्यक्रम ने तुमचो स्वागत करुंसे।
मुख्यमंत्रीजी
धन्यवाद। तुमचो आरु आपलो रेडियो आरु टीवी चो पूरे बसून भाति मोके दखतो लोग मनके बले।
जमाय संगवारी मन, सियान मन, जुवान मन, आया-बहिन मनके जुहार,। एबे चमास बतर मुर होउन गेली से हरियाली ले माटी माय चो सिंगार होयदे, आरु किसान भाई-बहिन मन चो जीवना ने उदिम जायदे।
सावन महिना
ने आगर करुन भगवान शंकर चो पूजा पष्टा होयसे। सावन सोमार चो उपास संगासोत।
कांवड़ धरुन कांवड़िया लोग मन जलयात्रा करसोत। ठान-ठान ने सावन मंडई होयसे। ठान-ठान ने रुख मन ने झूलना बांधून झूलतोर हरिक बले देतोर होयदे।
हरियाली चो तिहार जीवना चो तिहार बनून जायसे। एई काजे सपाय लोग के बधाई देंयसे।
संगवारी मन, जितरो होउक सके, रुख-राई मंडावा, आरु पिरथी के हरियर बनावा। आमचो सरकार ए बरक आठ करोड़ बुटा मंडातोर संकलप धरलीसे। जेके सपाय मिसुन भाति सम्पूरन करवां।
20 जुलाई
तारीख सपाय के सुरता संगातोर आय। गुलाय छत्तीसगढ़ चो सपाय जिला ने, तहसील
ने, ब्लाक ने, पंचायत ने ए सांगलोर होली से। कलेक्टर मन के आरु फारेस्ट चो
अधिकारी मन के, कि 20 जुलाई के गुलाय छत्तीसगढ़ ने आमी ए तिहार के मिलुन-मिसुन मनावां, आरु ए आठ करोड़ बुटा मंडातोर ए जे बड़े सोर आसे, हुनके आमी हुनी दिन मूर करुन संकलप के संपूरन करवां।
आपलो खुद चो भुंय ने, बेड़ा ने जसन बुटा मंडातोर आसे, जाले हुनचो काजे आमचो लगे बुटा मन आस आरु फर बीती बुटा मन बले आसे।
ए अभियान के आमके मिलुन मिसुन भाति करुक लागेदे
पुरुष उद्घोषक
डॉक्टर साहेब, सावन चो महीना किसान मनचो आसरा चो महीना रहेसे। किसान भाई-बहिन मन तो खुबे हरबर होउन ए बतर के टाकू रसोत। काय एसू चो बरसा, किसान भाई मन काजे हरीक चो बरसा माहा दखा देयदे?
मुख्यमंत्री जी
मैं ये कार्यक्रम चो माध्यम ले अन्नदाता मन के मोचो हिरदे ले मान करेंसे।
राज्य चो उन्नति बाड़ती आरु हरिक उदिम ने आमचो किसान भाई-बहिन मन आरु हुनचो घर चो लोग मन चो खुबे हाथ रली से। धान-पान ले धरुन दार मांदी, तिल मांदी, पाक मांदी ले धरुन पशु पोसतोर, मछरी पोसतोर सपाय बाटे बड़े-बड़े जीत मिरली से। छत्तीसगढ़ के पांच बरक ने चार हार ‘राष्ट्रीय कृषि कर्मण‘ पुरस्कार मिरली से।
ए बरक नंगत बरसा होतोर हिसाब दखा देयसे, जेचो ले एसु उपजन जो नुआ कीर्तिमान बनातोर आसरा आमी करुंसे।
खरीफ 2017 ने 48 लाख हेक्टेयर रकबा ने बुनतोर सोर उवाटलो आसे। जे थाने 36 लाख 50 हजार हेक्टेयर ने धान बुनतोर होयदे।
4 लाख हेक्टेयर ने दार मांदी चो फसल, 3 लाख हेक्टेयर ने तिल मांदी चो फसल आरु डेढ़ लाख हेक्टेयर ने साग-सब्जी, डांडा ये सपाय फसल मंडातोर होयदे।
ए बरक ने अनाज, दलहन, तिलहन, साग-सब्जी मिसाउन 91 लाख 76 हजार मिटरिक टन फसल उपजातोर आमचो अंदाज आसे।
मैं भगवान के सुमरना करेंसे कि से सोर सम्पूरन होओ आउर नंगत फसल किसान चो घर ने हरिक उदिम चो बरसा होओ।
महिला उद्घोषक
माननीय
मुख्यमंत्री जी, गोटोक समया रहे, जेबे किसान मनके ए फिकिर करुक पड़ते रहे कि
बीज कहां ले आनवां, खत कसन मिरेदे, दवई ओखत कसन मिरेदे, बिजली कसन मिरेदे?
आपन मन असन काय बेवस्था करलासाहास कि जेचो ले किसान भाई-बहिन मन कांई चिंता-फिकिर नी करुं, आपलो जमाय समया आरु मसागत के, बेड़ा चो काम ने देउक सकदे।
मुख्यमंत्रीजी
आमी किसान
मन चो सुविधा काजे योजना मन चो असन ताना बाना बनालूंसे, कि किसान मन के
सपाय जीनिस नंगत समया ने, कांई तकलीफ नाहलो मिरुक सकेदे।
7 लाख 45 हजार कुंटल बीज के आउर 10 लाख 65 हजार मिटरिक टन खत जुहातो उवाट बले होली से।
किसान मन
के आगे 14 प्रतिशत ब्याज ने खेती किसानी काजे करजा धरुक पड़ते रहे, जे आगर
मोल होतो के किसान मन बियाज पटातो हिसाब ने डंड होते रहोत आउर पटाउक नी
सकतो कारन हुन मन चो बाड़ती थेबुन जाते रहे। अदांय मांहांग करजा के गुचाउन
दिलुंसे।
आमी सरलगा
बियाज चो मोल कम करलू आरु पांच साल माहा होली, बियाज नाहलो कम समया चो कृषि
ऋण देउंसे, जेचो फायदा रोजे बरक 11 लाख किसान मन के मिरेसे।
मैं ये गोठ
के बले सांगतोर साफ करेंसे कि छत्तीसगढ़, देश चो पहिल राज्य बनू रहे, जे
किसान मन के बियाज नाहलो करजा देतो बेवस्था करु रहे।
राज्य ने
किसान आगे 150 करोड़ रुपया करजा बले नी धरुक सकते रला, मांतर बिन बियाज जो
करजा होतो के एबे 3000 करोड़ रुपया ले आगर बेड़ा खाड़ा कमानी काजे करजा
उठासोत।
काहां 150
करोड़ रुपया आरु कहां 3 हजार करोड़ रुपया। ए चो ले आमी जानुक सकूं कि
छत्तीसगढ़ ने किसान मन चो अर्थव्यस्था के कितरो बाड़ती मिरली से। 20 गुना आगर
करजा धरतो के हुन मन चो उपजन मोल बले क्येक गुना आगर बाड़लीसे।
धान
छत्तीसगढ़ जो जीव परान आए। एई काजे आमी धान घेनतोर पारदर्शी आरु जोरदार
बेवस्था करलूसे। आमचो किसान मन चो भलई बीती बेवस्था चो गुलाय देश ले
संहरानी होयसे।
1 हजार 989 उपार्जन केन्द्र मन ने धान घेनतोर बेवस्था आसे।
गेलो 13 बरक ने 6 करोड़ 12 लाख मिटरिक टन धान घेनतोर होली आरु किसान मन के असनी 64 हजार 730 करोड़ रुपये देतोर होली।
बेड़ा-खाड़ा कमानी खर्चा कम होतो के, नंगत फसल आरु घेनतो उवाट नंगत होतो कारण किसान मन चो बाड़ती होलीसे, जेचो ले गांव मन ने घर मन बाड़ते जायसे। किसान भाई बहिन मन, पीला-झीला मन चो पढ़ई-लिखई ने नंगत खरचा करसोत। मोटर सायकल, ट्रेक्टर, थ्रेसर, हार्वेस्टर ए सपाय चो घेनतोर उवाट बाड़लीसे। एई काजे मैं बलेंसे कि किसान मन चो जीवना ने सुख-शांति बीती बाड़ती होलीसे।
धमतरी में
प्रदेश चो पहिल ‘किसान बाजार‘ मूर होली से। जिला प्रशासन चो उवाट हिसाब ने
असन बेवस्था होली, जेथा उपजातो लोग आरु घेनतो लोग लगे-लगे ईला, आरु कोचिया मन गुचला। असन करुन साग कमाऊ किसान के आपलो उपजन चो नंगत मोल मिरेसे आरु लोग बाग के सुकाल आरु नंगत साग बरे मिलेसे।
‘किसान
बाजार‘ ने साग कमाऊ लोग चो सत्यापन, पंजीयन, काउंटर आबंटन, तौल मशीन ए सपाय
चो बेवस्था करतोर होली से। साग चो मोल गोटोक समिति बाटले करतोर होयदे। एथा
रोजे दिना डेढ़ टन माहा साग बिहाने दुय घंटा ने बिकुन जायसे।
मोचो बलतोर आसे कि असनी बेवस्था दुसर जिला मन ने होओ।
पुरुष उद्घोषक
माननीय मुख्यमंत्री जी असन काय काय योजना मन आसोत, जे किसान मन चो जीवना सुधरातोर बाट ने नेतोर काम करेसोत
मुख्यमंत्रीजी
छत्तीसढ़ पहिल राज्य आय, जे 5 एचपी चो पम्प तक ने फोकाहा ने बिजली देतोर सुविधा देयसे।
गोटोक पम्प ने 7 हजार 500 यूनिट तक फोकाहा ने बिजली देतो के गोटोक किसान के 31 हजार रुपया माहा रोजे बरक लाभ मिरेसे।
अनुसूचित जाति/जनजाति चो किसान मन के गोटोक किसान के 50 हजार माहा फायदा ए योजना ले मिरेसे।
इतरई नांई,
जे थाने बिजली देतोर उवाट नी होउक सके, हुंता सौर सुजला योजना हिसाब ने
दुय बरक ने 51 हजार सोलर पम्प देतोर योजना मूर होलीसे।
ये योजना
ने 3 लाख ले 5 लाख मोल चो पम्प किसान मन के सोजे सात हजार ले 20 हजार रुपए
ने देतोर होयसे। 12 हजार किसान मन के ये योजना चो लाभ मिरलीसे।
नानी आरु
बड़े किसान मन के स्पिं्रकलर काजे 11 हजार 800 रुपया आरु दूसर किसान मन के 7
हजार 800 रुपया चो छूट देतोर होयसे। असनी ड्रिप काजे बले 40 हजार ले 60
हजार रुपया एक हेक्टेयर हिसाब ने छूट देतोर काम होयसे।
बरक 2016-17 ने 29 हजार हितग्राही चो सोर रहे। ए बरक 2017-18 ने आगर होउन 1 लाख ले आगर होउन गेलीसे।
माईक्रो एरीगेशन काजे नाबार्ड ले 193 करोड़ चो कर्जा धरुन सिंचाई सुविधा देतोर उवाट बनलीसे।
प्रदेश ने
सहकारी क्षेत्र ने 4 ठान शक्कर कारखाना खोलतोर होली। 12 हजार ले आगर किसान
मन के 33 हजार रुपया माहा औसत दर ने डांडा कमानी चो बोनस पैसा गेली।
परम्परागत
कृषि विकास योजना भीतरे 6 ठान जिला सरगुजा, सूरजपुर, जशपुरनगर, कोंडागांव,
दंतेवाड़ा आरु कोरबा चो गांव मन ने जैविक उवाट ले कमानी अभियान चलेसे। 9
हजार एकड़ ठान चो 8 हजार किसान मन एथा शामिल होलासोत।
जैविक खेती मिशन ने 5 जिला गरियाबंद, नारायणपुर, बीजापुर, सुकमा आरु दंतेवाड़ा थाने आउर 22 जिला चो गोटोक-गोटोक विकासखण्ड के संपूरन जैविक बनातोर उवाट बले तिआर करलो आसे।
‘पर ड्रॉप मोर क्रॉप‘ (गोटोक थिपा-आगर फसल) योजना ने 59 करोड़ रुपया ने 4 हजार 860 हेक्टेयर ने ड्रिप और 23 हजार ले आगर हेक्टेयर ने स्प्रिंकलर सिस्टम बनालो आसे।
राष्ट्रीय कृषि विकास योजना भीतरे नदी-झोड़ी रेटे 29 हजार ले आगर सेलो ट्यूबवेल खोड़तोर होलीसे। संगे-संगे 15 करोड़ रुपया चो 185 ठान चेकडेम बले बनालोर होली से।
किसान समृद्धि योजना भीतरे बरक 2017-18 में 5 हजार किसान मन चो बेड़ा ने 14 करोड़ रुपया ने बोरिंग नल बले खोड़तोर होली से।
शाकम्भरी योजना ने नानी किसान मन के 8300 बोरिंग नल खोडून भाति दिला आरु 1 लाख 86 हजार ले आगर पम्प दिला।
खरीफ
क्रांति विस्तार योजना ने 4 लाख 76 हजार किसान मन के 108 करोड़ रुपया लागत
चो बीज, फसल प्रदर्शन, एकीकृत कीटनाशक, बोरवेल, कृषि यंत्र चो फायदा दिलो
आसे।
किसान मन के 58 लाख रुपए ले आगर फोकाहा खसरा आरु नक्शा चो प्रतिलिपि दिला।
प्रदेश चो सिंचाइ बीती ठान चो रकबा 22 प्रतिशत ले बाढ़ून 34 प्रतिशत होउन गेली से।
अभियान
लक्ष्य भागीरथी भीतरे 106 ठान जुना आउर आगे चो नी सरलो योजना मन के पूरन
करतो के 51 हजार हेक्टेयर ठान ने नुआ सिंचाई करतो सकत होली से।
प्रधानमंत्री कृषि सिंचाई योजना ने पानी चो ‘कितरो आसे आरु कितरो लागेदे‘ ये फरक के गुचातो काजे जिला आरु राज्य ने भिने-भिने योजना तियार करलो आसे। ‘फास्ट ट्रेक‘ प्रगति काजे राज्य चो 3 सिंचाई परियोजना मन खारंग, मनियारी आरु केलो के धरलो आसे।
बरक 2019 तक ये योजना मन ले 42 हजार 625 हेक्टेयर ठान ने सिंचाई करतोर सकत बाड़ती होयदे।
महिला उद्घोषक
माननीय
मुख्यमंत्री जी, माननीय प्रधानमंत्री श्री नरेन्द्र मोदी जी मन किसान मन चो
आमदानी के बरक 2022 एत ले दुय गुना करतो सोर बनालासोत। असनी प्रधानमंत्री
फसल बीमा योजना के बले किसान मन चो भलई हिसाब ने गोटोक क्रांति बलतोर होउ
रहे। काय ए दुनो उवाट काजे राज्य सरकार बाटले कांई करलो आसे?
मुख्यमंत्री जी
देश ने
पहिल हार किसान मन चो आमदानी के दुय गुना करतो काजे समया हिसाब ने
कार्यक्रम बनालो आसे। जेथा जलवायु, माटी, हुंताय चो गुन सपाय के दखुन
रोडमैप बनालो आसे, कि कसन बेरा आमके कसन फसल धरतोर आय।
माननीय
प्रधानमंत्री श्री नरेन्द्र मोदी जी प्रधानमंत्री फसल बीमा योजना मूर करुन
जे बड़े उवाट मूर करु रहे। हुनचो खुबे फायदा छत्तीसगढ़ चो किसान मन के
मिरेसे। अकाल पड़ले, नाहले, बेड़ा भीतरचो, नाहले कोठारचो फसल के आईग, पानी
नाहले आउर कांई ले नुकसाल होलो बेरा ये योजना गोटोक बरदान असन आय।,
करजा धरतो किसान संगे-संगे करजा नी धरतो किसान मन संगे-संगे आधी नाहले गाहना ने कमातो किसान के बले प्रधानमंत्री फसल बीमा चो फायदा मिरेसे।
प्रदेश चो
बीमा भीतरे धान सिंचई बीती, धान सिंचई नोहला, जोंधरा, सोयाबीन, मुंगफली,
कांदुल, मूंग, उड़िद, उद्यान बीती फसल जसन केरा, पपई, बेलती, मांड़ बांगा,
बांगा, मिरी, आदा, पानागुबी, फूलगुबी, गोंदरी ये सपाय के बीमा भीतरे आनलो
आसे।
गेलो बरक
खरीफ आरु रबी फसल के मिसाउन राज्य ने 16 लाख ले आगर किसान मन के ये योजना
चो लाभ मिरली। जेचो काजे सपाय 340 करोड़ रुपया राशि प्रीमियम काजे सरकार
बाटले देतोर होली। जे थाने केन्द्र और राज्य सरकार चो आदो-आदो भाग-हिस्सा रहेसे।
बरक 2015 चो अकाल ने किसान मन के होलो नुकसान पलटा ने 650 करोड़ रुपए चो बीमा दावा चो पैसा किसान के देतोर होली।,
एई काजे मैं किसान भाई मनके अपील करेंसे कि प्रधानमंत्री फसल बीमा योजना ने भागीदारी करा, आपलो फसल के नुकसान ले बचावा।
पुरुष उद्घोषक
डॉ. साहेब, राज्य ने किसान मन के साहा देतो काजे कितरई संस्था मन चलेसे। ऐबे-ऐबे तुमी ‘किसान-मितान केन्द्र‘ खोलतोर जाहला करला साहास। ए चो ले किसान मन के काय लाभ होयदे?
मुख्यमंत्रीजी
आमी खुबे
असन संस्था मन मूर करलूसे जे किसान मन के समया बेरा काम एओत। आरु किसान मन
कसनी बले चीपा बेरा आपन के एकला नी मानोत। हुनके तन-मन दुनो हिसाब ले असन भरोसा रहो, कि सरकार आरु बेवस्था हुनचो संगे हमेशा ठिया आसे।
एई काजे
आमी गोटोक कृषि विश्वविद्यालय रहे, तेबले बले कामधेनू विश्वविद्यालय खोललू,
जे पशु पोसतोर उवाट ने किसान मन के बाट दखायदे आरु हुनी हिसाब ने पढ़ई बले
करायदे। एबे राज्य ने दुय ठान विश्वविद्यालय 31 ठान कृषि महाविद्यालय, 20
ठान कृषि विज्ञान केन्द्र मन चलेसे। राज्य ने ‘कृषि प्रशिक्षण अकादमी‘ बले
स्थापना होलीसे।
92 विकासखण्ड मनने शहीद वीर नारायण सिंह बहु उद्देश्यीय कृषक सेवा केन्द्र आरु 360 कृषक सूचना केन्द्र खोललो आसोत।
किसान मन के माटी चो जांच चो सुविधा देतो काजे 26 स्थाई आरु 174 मिनी मिट्टी परीक्षण प्रयोगशाला बले खुललीसे।
माटी जांच कार्ड वितरण काजे बले कीर्तिमान बनली। सोर ले 112 प्रतिशत आगर बल्ले 43 लाख 38 हजार कार्ड मन बांटतोर काम होलीसे।
उर्वरक,
पौध संरक्षण, औषधि, बायो फर्टिलाईजर, जैविक खाद, कृषि यंत्र ये सपाय के
परीक्षण काजे आरु गुन के जांच करतो काजे प्रयोगशाला मन बनालो आसे।
बिलासपुर, जगदलपुर आरु अंबिकापुर ने नुआ बीज प्रशिक्षण प्रयोगशाला मन खोललो आसे।
सपाय दुय
गांव चो मंजीगता गोटोक किसान संगवारी बनालो आसे। विकासखण्ड आरु जिला स्तर
ने किसान संगवारी मन चो सम्मेलन करतो निर्देश संभागीय आयुक्त और जिला
कलेक्टर मनके दिलो आसे, एचो ले गांव घर लगे किसान के तुरते नंगत सलाह मिरुक
सकेदे।
एई धाड़ी ने सपाय जिला मुख्यालय ने ‘किसान-मितान केन्द्र‘ खोलतोर उवाट होलीसे। एचो ले किसान मन के गोटकी छत चो खाले जमाय जानकारी मिरुक सकेदे। सपाय विभाग चो सहायता बले मिरुक सकेदे।
ए केन्द्र
ने राजस्व, कृषि, सहकारिता, ग्रामीण विकास, ऊर्जा, जल संसाधन विभाग,
सहकारी बैंक सपाय चो अधिकारी मन चो ड्यूटी लगालो आसे। एथा दूरभाष चो बले
दुरभाष चो बले सुविधा देतोर होयदे। एचो ले किसान भाई पूरे एउन भेंटघाट करुक
सकदे आउर नी एउक सकतो बेरा फोन करुन बले आपलो चीपा के गुचाउक सकदे।
राष्ट्रीय स्तर ने ‘ई-नाम‘ बल्ले इलेक्ट्रॉनिक कृषि बाजार चो बेवस्था ले छत्तीसगढ़ चो 14 ठन मंडी के जोड़ून दिलू से। एचो ले आमचो गांव-गांव ने रतो किसान भाई मन के फायदा मिरेसे। देश ने काय भाव चलेसे, ये पता चलेसे। किसान मन के आपलो फसल के नंगत मोल ने बिकतो काजे सहायता मिरेसे।
महिला उद्घोषक
डॉ. साहेब, एक जुलाई 2017 चो दिन भारत चो आर्थि इतिहास ने गोटोक नुआ अध्याय होली। जी.एस.टी. चो मूर संगे-संगे देश ने अप्रत्यक्ष कर चो नुआ उवाट मूर होली से। हुनचो काजे छत्तीसगढ़ चो काय तियारी करलो आसे आरु एके तुमी काय हिसाब ने दखसास?
मुख्यमंत्री जी
आगे कायाय कि दुकान बीता के भिने-भिने काम धंधा काजे 16 परकार चो कर पटाउक पड़ते रए, जेके गुचाउन एबे गोटकी, जीएसटी के पटाउक लागेदे, जेचो काजे आनलाईन बेवस्था करतोर होयसे।
बैपारी मन के भिने-भिने क्येक किसम चो कर पटातो आउर हुन सपाय चो हिसाब-किताब संगातो काजे खूबे समया देउक लागते रहे, एचो ले हुन मन के चीपा होते रहे। एबे एचो ले हुन मन बाचदे।
एई काजे
प्रधानमंत्री श्री नरेन्द्र मोदी जी नुआ बीती कर उवाट के आर्थिक आजादी नांव
दिलोसे। हुन मन जीएसटी के ‘गुड एंड सिम्पल टेक्स‘ बल्लासोत। जेचो माने
होयसे नंगत आरु सुकाल कर।
असन हिसाब ने आजादी मिरलो पाछे देश ने जे कर मन चो खुबे असन जाला ओछालो माहा होउ रए। हुनके सारुर दिलो आसे।
ए अर्थव्यस्था के चमक नाय बनातोर मूर आय।
भारत के आर्थिक महाशक्ति बनातोर नंगत मूर आय।
जीएसटी ले बैपारी, धंधापानी लोग मन के तो सुविदा होयदे चे, संगे-संगे असनी लोग, आगर करुन गरीब लोग के बले, रैयत के खुबे फायदा होयदे।
खेती-कमानी आरु घर ने बावरतो आगर जीनिस मन के जीएसटी कर ले बचालो आसे।
रैयत चो
लागतो हिसाब ने 80 प्रतिशत जीनिस मन ने सिरिप 5 ले 18 प्रतिशत चो मंजी
जीएसटी लगालो आसे। हुनचो ले उपरे चो लोग मन चो जीनिस मन ने चे 28 प्रतिशत
हिसाब ने जीएसटी लगालो आसे आरु जे मन चो गेनती बले कम आसे।
छत्तीसगढ़
ने तुरते परभाव हिसाब ने आमी आरटीओ चो 16 ठान नाका के बंद करुन दिलु। एचो
ले जीएसटी चो जसन बिचार आसे, हुनी हिसाब ने सरसरा गाड़ी मोटोर एउक जाउक
सकेदे। एचो ले एतो समया ने क्येक फायदा दखुक मिरुक सकेदे।
असनी जीएसटी चो स्वागत सपाय के मिलुन मिसुन करतोर आय।
मैं भरोसा देंयसे कि जीएसटी गांव, गरीब आरु किसान चो भलई काजे आय।
पुरुष उद्घोषक
सपाय सुनतो भाई-बहिन मन । तुमचो गोठ आमके चिट्ठी ले, सोशल मीडिया, फेसबुक, ट्विटर संगे-संगे एसएमएस ले बले खुबे माहा गिनती ने मिरते जायसे। एचो काजे सपाय के खुबे-खुबे धन्यवाद।
एतो समया
ने बले तुमन मर आपलो मोबाईल चो मैसेज बॉक्स ने आरकेजी चो पाछे स्पेस धरा,
फेर आपलो बिचार लिखुन भाति 7668-500-500 नम्बर ने पठाउन दियास आरु संदेश चो
सरासरी ने आपलो नांव आरु पता लिखतोर नी भुलका।
मुख्यमंत्री जी
मंय हरिक
आसें कि ए हार खुबे असन चिट्ठी आरु संदेश बुटा मंडातोर हिसाब ने ईलीसे।
मोहन निषाद, विक्रम क्षत्रिय, राधेश्याम साहू, ए सपाय ये सलाह दिलासोत कि
बूटा मंडातोर राशि चो नंगत उपयोग होतोर आये। डिसेंट देवांगन, पिकड़ गच जो
बूटा मंडातोर, आरती अवस्थी ओसो जमक चो बूटा मंडातोर सलाह दिलासोत।
लक्ष्मी
प्रधान, अरविंद कुमार सिंह, सोनू विश्वकर्मा, नरेश वर्मा, सतीश मिश्रा,
माधुरी सिंह, बाबर शेख, विपिन सिंह चंदेल, सुधीर वैश्य ये सपाय आमचो ‘हरियर
छत्तीसगढ़‘ के सहरालासोत आरु एचो ले सपाय के जुड़तो अपील करलासोत।
कमलेश वानखेड़ तो मोके रुख माहा जीवना मीरो असन शुभकामना दिलोसे।
आपन मन चो सलाह ले मोके हिम्मत मिरेसे। आपन सपाय के मोचो धन्यवाद।
ए महीना 6 जुलाई के डॉ. श्यामा प्रसाद मुखर्जी चो जन्मदिन मनातोर होली। 19 जुलाई के डॉ. खूबचंद बघेल चो आरु 23
जुलाई के अमर शहीद चंद्रशेखर आजाद चो जन्मदिन आय। मंय ए महापुरुष मन के
पांय पडे़ंसे, ए मनचो करलो उदीम बाट दखालो जीवना आमके जीवतो नंगत बाट दखाते
रदे।
आरु सुनतो लोग मन समया आए ‘क्विज‘ चो।
चौदहवां ‘क्विज‘ चो प्रश्न रली
पहिल ‘अंतर्राष्ट्रीय योग दिवस‘ केबे मनातोर होली।
ये चो सही उत्तर आय )A) सन 2015
सबले पहिल जे पांच छान, सुनतो लोग मन सही उत्तर पठाला से हुन मन चो नांव आय
1 श्री कुलेश्वर सिंह ठाकुर, मिलौनी, जिला बेमेतरा
2 श्री जीवनलाल रजक, लक्षणपुर, जिला बलौदाबाजार
3 श्री सत्येन्द्र साहू, तेलीबांधा, रायपुर
4 श्री ऋषभ चौहान, डोंडे खुर्द, जिला रायपुर,
5 श्री तेजेन्द्र कुमार साहू, रत्नाबांध धमतरी
पुरुष उद्घोषक
अदांय दादा-दीदी मन समया आए 15 नम्बर चो क्विज चो सवाल आय
14 अगस्त 2017 के डॉ. रमन सिंह जी, मुख्यमंत्री चो रुप ने कितरो दिन पूरा करसोत।
एचो सही जवाब ) A) 4500 दिन
(B) 5000 दिन
एमन ने गोटोक आय
आपलो जवाब
देतो काजे आपलो मोबाईल चो मैसेज बॉक्स ने QA लिखा आरु स्पेस देउन Aनाहले B
जे बले तुमके सही आय असन लागेसे, हुन गोटोक अक्षर लिखुन भांति 7668-500-500
नम्बर ने पठाउन दिया। संगे-संगे आपलो नांव आरु पता लिखतोर नी भुलका।
तुमी सपाय
सुनते रहा, रमन चो गोठ आउर आपलो प्रतिक्रिया के सांगते रहा। एचय संगे आजी
चो अंक के आमी एथाय सारुंसे। एतो अंक ने 13 अगस्त के फेर होयदे तुमन मन
संगे भंेटघाट। तेबे तक काजे आमके दिया बिदा। सपाय के जुहार।
