सुनतो लोग मन के जुहार!
- पुरूष उद्घोषक बाटले आकाशवाणी चो विशेष प्रसारण ‘रमन चो गोठ’ ने आमी, सपाय सुनतो लोग मन चो हार्दिक स्वागत करूंसे, अभिनंदन करूंसे। कार्यक्रम चो इक्कीस नम्बर कड़ी चो काजे आकाशवाणी चो स्टुडियों ने माननीय मुख्यमंत्री साहेब अमरलासोत।
- डॉक्टर साहेब जुहार, खुबे-खुबे स्वागत आय येई कार्यक्रम ने ।
मुख्यमंत्री साहेब
- धन्यवाद। आपन चो बले अउर आपलो रेडियो आरू टी.वी. चो पूरे बसून भाति मोके सुनतो लोग मन चो बले। जमाय साथी संगवारी, सियान-जुवान, माय-बहिन मन के जय जुहार।
महिला उद्घोषक
- माननीय मुख्यमंत्री साहेब, येई बरख छत्तीसगढ़ माध्यमिक षिक्षा मण्डल बाटले कक्षा 10 वी अउर बारहवीं चो नतीजा मन समया ने घोषित करून दिया गेलीसे। समया ने नतीजा घोषित होतो काजे बधाई। येई हार चो नतीजा सांगसोत कि गांव अंचल मन में षिक्षा चो गुणवत्ता बढ़ातो चो जसन प्रयास कराजायसे, उन सपाय सफल होसोत। माननीय मुख्यमंत्री साहेब काय आपन बले असने चे विष्लेषण करला साहास आरू एचो उपरे आपन चो काय राय आसे ?
मुख्यमंत्री साहेब
- येई बरख चो नतीजा गेलो बरख ले खुबे अच्छा रली। खुबे संख्या ले पीला मन पास होला सोत। खुबे घर मन ने खुषी हरिक मन इलीसे, एचो काजे पीला मन, पालक मन आरू गुरूजी मन के बधाई। कोनी कारण ले जे पीला मन पास नी होउक सकला नहाले मन माफिक नम्बर नी पाउक सकला, हुन मन के चिंता करतो चो जरूरत नी आय बल्कि खुब्बे तैयारी ले आगे चो परीक्षा देओत अउर अच्छा ले पास होवोत।
- मोचो मानतोर आय कि असन कोनी परीक्षा जीवना चो आखिरी परीक्षा नी होये। पुरे कितलोय अवसर मिरू आत, जेबेे आपन खुदे के साबित करूक सकासे। येई काजे पीला मन आरू हुन मन चो माय-बाप कसने परकार चो दबाव नहाले लाज महसूस नी करोत बल्कि सामान्य रूप ले रउन भांति पीला मन चो मनोबल बढ़ाओत अउर आगे चो तयारी करोत।
- कक्षा बारहवी ने एई हार अब्बल पांच जिला मन ने बालोद, मुंगेली, कांकेर, बेमेतरा अरू कबीरधाम चो नाव आसे। ये सपाय जिला मन ने षहर खुबे नानी आत आरू ए मन चो संख्या बले खुबे कम आय। गांव खुबे आसोत। बल्ले कि टाप फाईव ने एई जिला मन चो एतो चो मतलब आय, गांव मन ने षिक्षा चो स्तर ने सुधार।
- मोके एई दखुन भाति खुबे हरिक लागली कि 27 ले 23 जिला मन ने लेकी मन आगर संख्या ने पास होलासोत। एचो मतलब एई आय कि बालिका षिक्षा के बढ़ावा देतो चो आमचो कोषिष सफल होसोत, एई उपलब्धि चो काजे मैं आजी बेटी मन के हुन मन चो पालक मन के, हुन मन चो स्कूल चो गुरूजी बहिनजी मन के, सपाय के बधाई देंएसे।
- कक्षा दसवी चो नतीजा बले असने पेटर्न (तरीका) ने इलासोत।
- कक्षा दसवी ने दंतेवाड़ा, कबीरधाम, कांकेर, जसपुर अरू बालोद जिला मन टॉप फाइव ने आसोत।
- कक्षा दसवी ने सिरप पांच जिला मन असन आत, जेथा खिंडिक आगर संख्या ने लेका मन पास होलासोत। ऐ जिला मन आत नारायणपुर, कोंडागांव, बीजापुर, सुकमा अरू बलरामपुर। बाचलो सपाय 22 जिला ने लेकी मन आगर संख्या ने पास होलासोत।
- दुनो बोर्ड परीक्षा मन ने जेथा पास होतो बीती लेकी मन चो संख्या लेका मन ले खिण्डिक कम आसे, हुन मन आदिवासी बहुल जिला मन आत।
- एचो ले ऐ बले स्पष्ट होएसे कि आदिवासी अंचल मन ने खिंडिक अउर मेहनत करा जाओ, तेबे ऐता बले पास होतो बीति लेकी मन चो संख्या आगर होउन जाएदे। एबे हालाकि तउल चो मुकाबला आसे।
- कोनि आष्चर्य नु आय कि एतो बरग सपाय 27 जिला मन ने लेकी मन चे बाजी मारून देवोत। असने प्रकार आमि गोटोक स्वस्थ हारा जिता चो माध्यम ले माननीय प्रधान मंत्री साहेब चो आवहान- ”बेटी बचाओ-बेटी पढ़ाओ“ सफल बनांउसे। ऐ असन मजबुत बुनियाद आय, जेचो उपरे षिक्षित छत्तीसगढ़ चो सपना पूरा करतोर संभव होयदे।
पुरूष उद्घोषक
- माननीय मुख्यमंत्री साहेब, माननीय प्रधानमंत्री साहेब चो ”स्वच्छ भारत“ चो आव्हान ले षहर मन अरू गांव मन चो तस्वीर बदलेसे। हालने चे केन्द्र सरकार चो बाटले राष्ट्रीय स्तर ने करालो ”स्वच्छता सर्वेक्षण“ चो नतीजा मन इलासोत। एने छत्तीसगढ़ ने ”अंबिकापुर“ षहर देष ने अव्वल इलीसे। छत्तीसगढ़ ने आपन ”स्वच्छता मिषन“ के हाथे-हाथ निला साहास आरू एके पूरा प्राथमिकता दिलासाहास, मान्तर दुसर
राज्य मन चो तुलना ने छत्तीसगढ़ चो नतीजा मन चाहलो चो मुताबिक नी रहे, आपन चो काय मत आसे ?
मुख्यमंत्री साहेब
- सबले पहिल तो मैं अंबिकापुर चो प्रषासन आरू जनता के साधुवाद देंयसे, धन्यवाद देंयसे, बधाई देंयसे कि आपन छत्तीसगढ़ चो नाव रोषन करलास। दुई लाख चो आबादी बिती षहर मन चो श्रेणी ने अंबिकापुर के पहिल स्थान मिरतोर असल ने बड़े उपलब्धि आय। असन सर्वे आरू रैकिंग ले आमके बेहतर तरीका ले काम करतो चो प्रेरणा आमके मिरू आय अउर जेथा कितली कमी मन आसे, हुन ने सुधार करतो चो बाट बनुआय।
- अउर षहर मनके सफलता नी मिरतो चो खुबे कारण होउक सकदे। मोचो मानतोर आय कि एबे आमि प्रक्रिया ले गुजरूंसे। आमन मन राष्ट्रीय लक्ष्य 2019 चो मुकाबला ने गोटोक बरख आगे ले 2 अक्टुबर 2018 तक ले छत्तीसगढ़ के स्वच्छता मिषन चो मापदंड मन चो अनुरूप स्वच्छ बनातो चो लक्ष्य राखलुसे अउर एई दिषा ने आगे बढुंसे।
- ”स्वच्छता सर्वेक्षण “ गोटोक दरपन आय, जे मंझार चो अंतराल ने आमके सचेत करूआय कि देष आरू परदेष मन चो तयारी कसन आसे अउर कसन ढंग ले तेजी ले आगे बढ़तोर आसे।
- छत्तीसगढ़़ चो संदर्भ ने मैं एई बलुक चाहेंसे कि आमी प्रदेष ने स्वच्छता चो अधोसंरचना आरू संस्कार बनातो चो काजे बले गोटोक ढंग चो लड़ई लड़ूंसे। राज्य मन चो सामाजिक-आर्थिक-भौगोलिक परिस्थिति मन आरू विरासत ने मिरलो समस्या मन के हल करते-करते आमके कोनि बले सफलता साधारण कोषिष मन ले नी मिरे। आमके असाधारण कोषिष करूक पड़ु आय।
- हालाकि अंबिकापुर खुद बले एई समस्या मन ले जूझते-जूझते आगे बढ़लीसे। अंबिकापुर चो टीमवर्क, ”स्वच्छ अंबिकापुर मिषन सहकारी समिति “ महिला सदस्य मन बाट ले घर-घर जाउन कचरा जमा करतो चो प्रणाली, बैटरी-चलित आरू मानव-चलित रिक्षा मन चो उपयोग, अलग-अलग क्षेत्र मन ने 17 ठस अपषिष्ट पदार्थ मन चो संचालन केंद्र मन ने ओदा आरू सुखलो कचरा मन अलगातो चो काम, अलगालोर कचरा मन के बिकतो चो ढंग चो विकास, ऐई काम ने लगलो मेहरार सदस्य मन के युजर चार्ज चो रूप ने षुल्क चो प्राप्ति, स्वच्छता के आदत बनातो काजे प्रभावपूर्ण जनजागरण अभियान असने अउर चो खुबे योगदान अंबिकापुर चो सफलता ने रली।
- मैं चाहेन्दे कि आमचो अउर षहर अंबिकापुर के रोल-मॉडल बनाओत अउर हुन मन ले सबक नेओत। असन तो हरेक षहर चो विषिष्ट संरचना, परिस्थिति मन, समस्या मन, मानव संसाधन, सामाजिक संगठन, प्रषासनिक अमला मन ने प्रेरणा चो स्तर आरू एचो मंझी ले निकरतो बिती समाधान होउआत, जेचो अनुरूप हरेक जिला मन, हरेक षहर के मौलिक कोषिष करतोर चाहिये।
- मोचो मानतोर आय कि एबे ताके निरास नी होतोर आय बल्कि एई प्रेरणा नेतोर आय, जे काम अंबिकापुर ने होउक सकु आय, हुन दुसर षहर ने काय काजे नी होउक सके आरू खुदे अंबिकापुर के आपलो स्थिति बनाउन राखतो काजे खुबे मेहनत करतोर आसे।
- मैं अंतर्राष्ट्रीय गायत्री परिवार चो संस्थापक, महानचिंतक, आचार्य श्रीराम षर्मा चो विचार आपन मन चो संगे साझा करूंक चाहंेसे- हुन बलु रला-”असफलता यह सिद्ध करती है कि सफलता का प्रयास पूरे मन से नही हुआ“। (असफलता एई सिद्ध करू आय कि सफलता चो कोषिष पूरा मन ले नी होली)। एई काजे कोषिष मन ने कोनि गलती नी होतोर चाहिये।
महिला उद्घोषक
- माननीय मुख्यमंत्री साहेब, आजी नतीजा मन चो चर्चा चलेसे। एबे गोटोक सबले बड़े नतीजा चो बारे में आपन चो विचार साझा करतो चो मन होयसे। भारत चो लोकतंत्र चो इतिहास ने 26 मई 2014 के गोटोक ऐतिहासिक नतीजा एउन रली, देष चो जनता बरख 2014 ने होलो आम चुनाव ने प्रचण्ड बहुमत ले जनादेष देउन माननीय श्री नरेन्द्र मोदी साहेब के भारत चो प्रधानमंत्री चो पद ने आसीन करून रली। माननीय मोदी साहेब चो प्रधानमंत्री समया चो तीसर बरख एइ महीना ने पूरा होयदे। एई तीन बरख मन ने माननीय मोदी साहेब चो योजना मन आरू उपलब्धि मन उपरे आपन चो विचार, आमचो सुनतो लोग मन सुनुक चाहसोत।
मुख्यमंत्री साहेब
- आपन मन के सुरता होयदे कि 26 मई 2014 चो पहिल देष कोन आर्थिक, राजनीतिक, सामाजिक आरू विकास संबंधी समस्या मन ने घिरून जाउन रली। ”अनिर्णय“ व ”पॉलिसी पैरालीसिस“ चो बोलबाला रली। भ्रष्टाचार सबले बड़े समस्या बनुन जाउन रली। असल ने माननीय मोदी साहेब के मिरलो जनादेष, देष चो समस्या मन चो चिखला ले बाहिर निकरातो चो जनादेष रली। भारत माता चो गौरव फिरातो चो जनादेष रली।
- माननीय मोदी साहेब एते खानी गोटोक चो बाद गोटोक महत्वपूर्ण फैसला नीला, जेचो कारण भारत सरकार चो कपार ले ”अनिर्णय“ आरू ”पॉलिसी पैरालीसिस“ चो कलंक मिटुल गेली।
- मोदी साहेब आपलो आचार-व्यव्हार, कठोर-मेहनत आरू दूरदर्षी निर्णय मन ले सरकार चो असन छवि बनाला कि हुन चो धाक देष आरू
दुनिया ने जमुन गेली। हुन चो कर्मठता चो ओझ, हुन चो वाणी ने दखा पड़ेसे। अउर हरेक विषय उपरे स्पष्ट पारदर्षी, ईमानदार आरू जनहितकारी सोच चो संगे, हरेक फैसला के दृढ़ता ले लागू करतो चो मजबूत ईच्छा षक्ति चो कारण, हुन मन विष्वास चो प्रतिक बनुन गेला।
- मोदी साहेब भारत चो संसाधन मन आरू भावना मन चो अलख जगातो चो काजे कितलोई देष मन चो दौरा करला, जेचोले हुन देष मन चो सरकार मन चो संगे भारतवंषी मन के बले बिष्वास ने नेतो चो बाट बनली अउर असने परकार खिंडीक कार्यकाल ने चे माननीय मोदी साहेब दुनिया भर ने भारत चो अस्मिता, भारत चो संभावना मन, भारत चो मौका मन चो प्रतीक बनुन गेला।
- आमचो संविधान, आमचो महान लोक तंत्र चो आत्मा आय। माननीय मोदी साहेब संविधान चो भावना मन चो अनुरूप राज्य मन के हुन मन चो हक, हिस्सा आरू भागीदारी दिलातो चो पहल करला। योजना आयोग के खतम करला आरू नीति आयोग चो गठन करला। ताकि राज्य सरकार मन के संविधान चो भावना मन चो अनुरूप भिन-भिन राज्य मन चो सक्रिय रूप ले ”टीम इंडिया“ चो सदस्य बनाउक जाउक सको आरू ”सहकारी संघवाद“ के मजबूत बनातो चो दिषा ने कितलोय निर्णय नीला।
- राज्य मन के मिरतो बिती राजस्व के 32 ले बढ़ाउन 42 प्रतिषत करून दिया गेली आरू राज्य मन के आपलो जरूरत चो हिसाब ले खर्चा करतो चो अधिकार दिया गेली।
- खुबे बरख ले थेबलो खनिज नीति के पूर्णता देउन एके लागू कराला, संगेचे खनिज वन चो नीलामी ले राज्य मन के आर्थिक संसाधन देतो चो बाट बनाया गेली।
- संविधान आरू सहकारी संघवाद चो भावना चो अनुरूप ”एक राष्ट्र, एक कर, एक बाजार“ चो व्यवस्था लागू करतो काजे ”जी एस टी कानून“ के संसद चो दुनो सदन मन ले पारित कराला। असने प्रकार देष ने कर सुधार मन चो माध्यम ले आर्थिक क्रांति चो गोटोक नुवा दौर षुरू होलीसे।
- ”जी एस टी “ ले संबंध ने निर्णय नेतो काजे जे ”जी एस टी परिषद“ चो गठन करा गेलीसे, हुनने बले राज्य मन के भागीदारी दिया गेलीसे। संग ने चे कर राजस्व ने राज्य चो भागीदारी बले बढ़ाया गेलीसे।
- मोदी साहेब चो दृढ़ इच्छा षक्ति ने आपलो देष चो 86 प्रतिषत मुद्रा चो ”विमुद्रीकरण“ करतो चो मामला ने भारत ने, दुनिया चो पहिल देष बनुन गेलीसे।
- विमुद्रीकरण चो माध्यम ने काला धन, जाली नोट, आतंकवाद, नक्सलवाद चो विरूद्ध बले ठस कदम उठातो संभव होलीसे।
- विमुद्रीकरण चो माध्यम ने देषभक्ति, ईमानदारी चो वातावरण बनली, जेचो ले मेहनत कष जनता के एई विष्वास होलीसे कि सरकार, हुन मन चो ईमानदारी चो कदर करेसे आरू हुन मन के ईमानदारी चो फायदा मिरेदे।
विमुद्रीकरण चो परिणामस्वरूप बैंक मन आवास ऋण मन चो ब्याज दर मन घटाला, उताय कैषलेष सोसायटी चो निर्माण चो दिषा ने तेज गति ने प्रगति होलीसे।
- माननीय मोदी साहेब विदेष नीति आरू रक्षा नीति चो मंझार चो घालमेल के खतम करते साफ संदेष दिलासोत कि आमि पड़ोसी मन चो संगे षांति ले रउक चाहूंसे, मान्तर सीमा मन चो सुरक्षा ले समझौता नी करूक सकुं।
- ”सर्जिकल स्ट्राईक“ आरू सेना चो मनोबल बढ़ालो ने देषवासी मन चो मनोबल बाढ़लीसे अउर आतंकवाद उपरे ”जीरो टॉलरेन्स“ चो नीति माननीय मोदी साहेब चो दृढ़ता चो प्रतीक बनुन गेलीसे।
- चुनाव सुधार मन आरू राजनीतिक दल मन के मिरतो बिती चंदा के नेउन पारदर्षिता चो निर्णय देष के राजनीतिक सुचिता चो बाट ने आगे बढ़ायदे।
पुरूष उद्घोषक
- डाक्टर साहेब निष्चित तौर ले माननीय प्रधानमंत्री साहेब चो फेसला मन भारत चो छवि के उजर करलीसे, उताय देष के आर्थिक मजबूती दिलीसे। हुन मन चो फैसला मन ले राज मन चो मान-सम्मान, पूछ-परख बाढ़लीसे आरू हुन मन ”टीम इंडिया“ चो सदस्य चो रूप ने गौरवान्वित होसोत। मान्तर मोदी सरकार चो निर्णय मन ले आम जनता के कसन परकार लाभ मिरेसे?
मुख्यमंत्री साहेब
- प्रधानमंत्री माननीय नरेन्द्र मोदी साहेब चो करिष्मा बीति नेतृत्व चो सबले बड़े विषेषता एई आय कि हुन मन चो सोच हुन मन चो चिंतन अउर हुन मन चो फैसला आम जनता के फायदा अमरातो चो काजे चे होउ आय।
- जे गोठ मन आमके छोटे-छोटे दखा देउ आय, हुन मन चो कितलो बड़े महत्व होउक सकु आय, ऐ गोठ मोदी साहेब अच्छा ढंग ले जानू समझू आत अउर असन विषय मन के जन आंदोलन चो रूप देउन देउ आत।
- माननीय मोदी साहेब असन-असन योजना मन षुरू करलासोत, जेचो ले समाज चो कोने बले वर्ग आरू जनता चो कोनी जरूरत नी छुउन नी रहुन जावो। एई काजे ”सबका साथ-सबका विकास“ (सबचो संग-सबचो बाढ़ती) आमचो मूल मंत्र आय।
- पं. दीनदयाल उपाध्याय षताब्दी बरख चो मौका ने एई फैसला निया गेलीसे कि ” लक्ष्य अंत्योदय-प्रण अंत्योदय-पथ अंत्योदय“ सरकार चो नीति- रीति चो बाट दखातो बीति सिद्धांत होयदे।
- याने कि समाज चो आखिरी लाईन चो आखिरी मनुख तक ले अमरतो आरू हुन चो जीवना संवारतो चो काजे मजबूत संकल्प आरू प्रतिबद्धता चो बाट में चलतोर आय।
- कोन सोचुक सकतो रलो कि षहर चो गरीब हो नहाले गांव हो नहाले वन अंचल ने कुड़िया मन ने रतो बीता लोग मन चो लगे आपलो बैंक खाता होयदे। मान्तर ”प्रधानमंत्री जन-धन योजना“ तीन बरख चो भीतरे करोड़-करोड़ लोग मन चो एई सपना पूरा करून दिली। एई योजना चो माध्यम ले भिन-भिन सरकारी योजना मन चो षत-प्रतिषत फायदा जनता के देतो चो बाट बले खुलुन गेलीसे।
- कैषलेष लेनदेन चो काजे ”भीम एप“ खूबे लोकप्रिय होयसे। करोड़-करोड़ लोग मन एके डाउनलोड करलासोत आरू उपयोग करसोत।
- जन-धन खाता, आधार कार्ड आरू मोबाईल के आपस ने जोड़ुन पारदर्षी आरू बिन गलती चो भुगतान चो असन व्यवस्था करा जायसे, जेचो ले कि कोनी परकार चो फर्जीवाड़ा (घोटाला) नी होउक सकेदे अउर कोनी पात्र हितग्राही फायदा ले बाचुन नी रहेदे।
- माननीय प्रधानमंत्री साहेब लक्ष्य दिलासोत कि सन 2022 तक ले हरेक भारतवासी चो मुंड उपरे आपलो छानी चो छांव रोहो, एचो काजे हुन मन ”प्रधानमंत्री आवास योजना“ चालू करलासोत अउर खुबे आकर्षक सब्सिडी (छूट) दिलासोत जेचो ले खुबे सस्ता दर ने गरीब मन के घर मिरूक सकेदे।
- देष ने असन जुवान मन चो संख्या खुबे आसे, जे उच्च षिक्षित (जुगे पढ़लो) नू आत अउर हुनर नी होलो चो काजे आपलो कमई चो अच्छा जरिया
नी अपनाउक सकला। एई कमी के खतम करतो चो काजे ”प्रधानमंत्री कौषल विकास योजना“ चो माध्यम ले आपलो लगलग चो आबादी, उद्योग, व्यवसाय अउर बले चो काजे उपयोगी रोजगार चो प्रषिक्षण दिया जायेसे।
- जुवान मन के आपलो रोजगार चालू करतो ने सबले बड़े बाधा खुद चो पुंजी नी होतोर अउर बैंक ले कर्जा नेतो चो काजे गारंटी चो व्यवस्था नी रतोर आय। एई समस्या के गुचातो काजे ”प्रधानमंत्री मुद्रा योजना“ षुरू करा गेलीसे ताकि युवा जाब सीकर नही जाब क्रियेटर बनो।
- मेक इन इंडिया/डिजिटल इंडिया/स्टार्ट-अप इंडिया/ स्टैंड-अप इंडिया- जसन अभियान मन चो कारण भिन भिन राज मन ने असने औद्योगिक नीति मन बनलासोत, जेचोले निवेषक आकर्षित होवोत। रोजगार चो मौका बाढ़ो आरू जीवना स्तर बाढ़तो चो बाट बनो।
- देष ने आजादी चो सात दषक (70 बरख) ने बले मेहरार मन के असन जीवना नी मिरूक सकली, जेचो ले कि मेहरार मन सुस्ता रउक सकोत। माननीय प्रधानमंत्री साहेब करोड़-करोड़ गरीब मेहरार मन के धुआं मुक्त रसोई (रांधा खोली) चो उपहार देतो चो काजे ”प्रधानमंत्री उज्जवला योजना“ चालू करलासोत।
- प्रधानमंत्री जीवन ज्योति बीमा योजना/प्रधानमंत्री सुरक्षा बीमा योजना- देष ने करोड़-करोड़ लोग मन चो काजे नुवा आषा चो किरण आय, जोन मन के डोकरा पहर ने, आपलो परिवार चो, समाज चो परिस्थिति मन चो कारण ने आर्थिक संसाधन आमके जुझूक पड़ु आय। असन लोग मन के सरलगा कमई चो जरिया दियातो काजे खुबे छूट दर मन उपरे निवेष (धन जमा) करले निष्चित महिना-महिना पेंषन दियातो चो व्यवस्था करा गेलीसे।
- आमचो देष ने किसान मन के सिंचाई चो काजे मानसून उपरे निर्भर रउक पडु़ आय। एके छाड़ुन पाकलो फसल के आइग, पूर, आरू अउर बले अनिष्चितता चो सामना करूक पड़ु आय। एचो ले निपटतो चो काजे देष चो इतिहास में पहिल हार सबले सस्ता किष्त उपरे सब ले आगर फायदा देतो बीती योजना ले ”प्रधानमंत्री फसल बीमा योजना“ चालू करा गेलीसे।
- स्वायल हेल्थ कार्ड योजना/ प्रधानमंत्री ग्राम सिंचाई योजना/प्रधानमंत्री सुकन्या समृद्धि / सांसद आदर्ष ग्राम/प्रधानमंत्री गरीब कल्याण/प्रधानमंत्री जन औषधि/ मिषन इंद्रधनुष/ दीनदयाल उपाध्याय ग्राम ज्योति/ ग्रामीण कौषिल्या योजना/ श्रमेव जयते योजना/ स्मार्ट सिटी/ अमृत/प्रसाद/हृदय योजना/रूर्बन मिषन एसने अउर दर्जन भर योजना मन आसोत, जेचो ले हरेक भारतीय चो सषक्तिकरण होयसे।
- हुन मन असन भारत चो संरचना करून दिलासोत जेचोने दुनिया चो अर्थव्यवस्था ने मुकाबला करतो चो क्षमता रोहो। हरेक भारतीय चो आर्थिक स्वावलंबन रोहो, सुस्ता आरू हरेक जीवना चो गारंटी रोहो। मेहरार मन के पूरा मान मिरो। जुवान मन चो उजर भविष्य सुनिष्चित रोहो। सड़क, रेल, टेलीकाम, बिजली, पानी, चिकित्सा, षिक्षा आरू रोजगार जसन बुनियादी सुविधा मन उपरे सब चो हक रोहो।
महिला उद्घोषक
- सुनतो लोग मन! आपन मन चो प्रतिक्रिया मन आमके आपलो चिठ्ठी, सोषल मिडिया-फेसबुक, ट्विटर चो संगे ैडै ले बले खुबे संख्या ने मिरसोत। येचो काजे आपन सपाय के खुबे-खुबे धन्यवाद।
- आगे बले आपन आपलो मोबाईल चो मेसेस बॉक्स ने त्ज्ञळ चो पाटकुति स्पेष नेउन आपलो बिचार लिखुन 7668-500-500 नम्बर ले पठाते रहा अउर संदेष चो आखिर ने आपलो नाव आरू पता लिखतो के नी भुलका।
मुख्यमंत्री साहेब
- सोषल मिडिया आरू चिटठी मन चो माध्यम ले खुबे असन सुनतो लोग मन आपलो प्रतिक्रिया दिलासोत।
- सिरवाबांधा जिला बेमेतरा निवासी श्री भुवन दास जांगड़े गोटोक खुबे अच्छा चिट्ठी लिखलासोत। हुन चिट्ठी के मैं पढ़ुन भांति सुनायेसे-
- एबे गर्मी चो मौसम आरू बिहाव चो सीजन आय। आपन ले बिनती आय कि कार्यक्रम ने आपन बिहाव चो जिकर जरूर करा। आरू हुन ने आया-बाबा, दुल्हा-दुलहिन मनले आग्रह करा कि बिहाव ने कम ले कम खर्चा करोत। खुबे तड़क भड़क नी होवो। आगर खर्चा नी होवो। पानी चो कमती उपयोग करा। खातो जिनीस चो बरबादी नी करा। दाईज नी निआ आरू नी बले दिया। सही उमर ने बिहाव होवो। गोहोड़ी ने आदर्ष बिहाव करा। मैं जांगड़े साहब चो सपाय गोठ मन ले सहमत आसें। एई काजे हुन मन चो पुरा चिठ्ठी पढ़ुन दिले कि आपन मन एई सपाय गोठ मन चो धियान राखा।
- अउर बले सुनतो लोग मन अवधेष षास्त्री, सुरेन्द्र हंसपाल, मुकेष बैसवाड़े, सीमा साहू, धु्रव महंत, उपेन्द्र निसाद, मुकेष वैष्नव बले खुबे सुझाव दिलासोत। मैं सपाय सुझाव मन के संबंधित विभाग मन ने पठायेंसे ताकि हुन चो उपरे कार्यवाही होउक सको।
- आपन सपाय के धन्यवाद, जयहिन्द, जय छत्तीयगढ़
पुरूष उद्घोषक
- अउर सुनतो लोग मन, येदाये बारी आय क्विज चो।
बारा नम्बर क्विज चो सवाल रली-
- ‘लोक सुराज अभियान -2017’ माननीय मुख्यमंत्री साहेब पहिल राति बिश्राम कहां करला?
जेचो सही जवाब आय - ;।द्ध सुकमा
- सबले झटके जोन पांच सुनतो लोग मन सही जवाब पठालासोत, हुन मन चो नांव आय-
1. श्री जनक लाल सोनवानी, ग्राम भर्रीटोला, जिला राजनांदगांव
2. श्री महाबल बघेल, हथनीपारा, भाटापारा, जिला बलौदाबाजार
3. श्री गुलषन महंत, ग्राम मोहतरा, जिला बलौदाबाजार
4. सुश्री लालिमा बघेल, रायपुर
5. सुश्री भारती साहू, पोंड़ी जिला कोरबा
महिला उद्घोषक
- अउर सुनतो लोग मन येदाय समया आय तेरा नम्बर चो क्विज चो, जेचो सवाल आय-
- ‘बरख 2017 के पंडित दीन दयाल उपाध्याय साहेब चो कोन बिति बरख मनातोर जायसे
- येचो सही जवाब (।) स्वर्ण जयंती वर्ष
(ठ) षताब्दी वर्ष
ये मन ले कोनी गोटोक आय।
- आपलो जवाब देतो काजे, आपलो मोबाईल चो मेसेज बॉक्स ने फ। लिखा आरू स्पेष देउंन । नहाले ठ जे बले आपन के नंगत लागेदे, हुन गोटोक अक्षर लिखुन 7668-500-500 नम्बर ले पठाउंन दिया। संगने आपलो नॉव आरू पता जरूर लिखा।
- आपन सपाय रमन चो गोठ सुनते रहा अउर आपलो प्रतिक्रिया मन ले आमके जनाते रहा। येचोय संगे आजी चो गोठ के आमी येताय समापन करूंसे। येतो गोठ ने 11 जून के होयदे आपन ले फेर भेटघाट। तेबे-तक चो काजे दिया आमके इजाजत।
जुहार।
